Rali – Apr 23, 2016

ராலி க. நி. தெக்காலம்  #141

ஏன் எதற்கென்றே கேட்டு

    சாத்திரச் சொல் கேளாது

தான் நினைப்பதொன்றே

    தான் சரியென இறுமாந்து

கூன் போட்டுக் குருடாகி

    வீணே சாகும் முன்னே ராலி

நான்முகனும் காணா நாதனை

    நண்ணுவ தெக்காலம்?

 

ராலி க. நி. தெக்காலம்  #142

கரமிருந்தும் நல்சாத்திரச்

    செயல் ஏதும் செய்யாது

உரம் போட்டு வெற்றுடல்

    மரமாய் வளர்த்து ஒரு

தரம் இப்பிறவி வந்தது அரிது

    என மறந்து இராது

பிரமன் சிரமரிந்தானை

    ராலி சிந்திப்ப தெக்காலம்?

 

ராலி க. நி. தெக்காலம்  #143

பேணுவது இவ் வெற்றுடல்

    பேசுவது வீண் பேச்சு

காணுவது ஒரு சிறு பயனுமிலா

    சிறு திரைக் காட்சி

தோணுவது வீண் எண்ணமென

    இராது பெண்ணோடு

ஆணுருவாய் நின்றானை ராலி

    வேண்டுவ தெக்காலம்?

Advertisements

SKC – Apr 23, 2016

உற்றவனே! உடன்பிறப்பே!

ஒருபொழுதும் நீயிங்கு

சற்றும் மனந் தளராது

சரமழையாய்க் கவிதை

நற்றமிழில் எழுத

நான் விழைந்தேன் விறகு

விற்றவனின் அருளாலே

வித்தகனே! நீ வாழி!

சிவனவன் நல்லருட்

சிந்தையில் திளைத்து

உவகை யுடனே

உள்ளில் இருத்தி

புவனந் தன்னில்

புண்ணியந் தேடி

பவசரவண பாலனை

மனச்

சுவடினில் மறந்து தமிழ்

சொல்வதும் முறையோ?

Rali – Apr 22, 2016

ராலி க. நி. தெக்காலம்  #138

வாசல் வீடு பொருளில்

    மனம் புதைத்து தினம்

ஊசல் ஆடுவது இவ்வுயிர்

    என்பது மறந்து அற்ப

ஈசல் போல் வீணே பிறந்

    திறந்து போகாது ராலி

கோசலேந்த்ர கோமகனைக்

    கும்பிடுவ தெக்காலம்?

 

ராலி க. நி. தெக்காலம்  #139

 

ஊன்று தினம் பார்த்துப்

    படிக்கும் தினச்சேதிக்குச்

சான்று இன்றியும் அன்றே

    நம்பி நல் வேத நூலை

ஈன்று எடுத்தாள் போல்

    மதியாதார் போலிராது

மூன்று நயனத்தானை

    ராலி வணங்குவ தெக்காலம்?

 

ராலி க. நி. தெக்காலம்  #140

விந்தையாம் இவ்வுலகில் பொருள்

    ஏறும் இறங்கும் பங்குச்

சந்தையில் மனம் பணம் குவித்தும்

    அழித்தும் இருக்கும்

மந்தை போன்ற மாந்தரை விட்டு

    விலகி ஒரு தாயுமிலா

தந்தையுமிலா வேந்தனை ராலி

    வேண்டுவ தெக்காலம்?